«АНА ҮЙІ» қоры өңірлік орталықтардағы жұмысты бақылауды күшейтуде

«АНА ҮЙІ» қоры өңірлік орталықтардағы жұмысты бақылауды күшейтуде

«АНА ҮЙІ» қоғамдық қоры ұйымның барлық ресурстық орталықтарында қамқорлығындағы аналар мен олардың балаларының қауіпсіздігін арттыруға бағытталған «Қауіпсіз балалық шақ» кешенді бағдарламасының іске қосылғанын хабарлайды.

Бағдарлама аясында қор қорғаныстың төрт жүйелі механизмін енгізуде:

— рұқсатсыз әрекеттердің алдын алу үшін қамқорлыққа алынған аналарды биометриялық сәйкестендіру;

— сүйемелдеуді қосарлы бақылау: өңірлік және орталық деңгейде бір мезгілде тіркеу;

— қамқорлыққа алынған барлық әйелдердің, соның ішінде архивтік істердің тарихына аудит жүргізу;

— көмек көрсету стандарттарынан кез келген ауытқуларды тіркеуге арналған сенім желісі.

Алғашқы шаралар дереу іске қосылды. Жүйені толық енгізу ағымдағы тоқсанның соңына жоспарланған.

Сонымен қатар, қамқорлыққа алынған аналардың барлық ағымдағы істері мен перзентханалардан берілген шығару құжаттарына қосымша тексеріс жүргізілуде, сондай-ақ олардың медициналық мекемелермен өзара әрекеттесу кезеңінде сүйемелдеу бақылауы күшейтілді.

Бағдарламаны әзірлеуге Қызылорда қаласындағы «Ана үйі» ресурстық орталығында өңірлік үйлестірушінің әрекетсіздігіне байланысты орын алған оқиға себеп болды.

2025 жылдың сәуір айында орталыққа екі кішкентай баласы бар жүкті әйел жүгінді. Қор гуманитарлық қағидаттарды негізге ала отырып, көмек көрсету туралы шешім қабылдады: қамқорлықтағы әйелге қауіпсіз тұру орны, тамақ, медициналық және психологиялық қолдау көрсетілді.

2025 жылдың күзінде әйел босану үшін перинаталдық орталыққа (перзентханаға) жатқызылды. Шығарылғаннан кейін жаңа туған нәрестені анасы заңда белгіленген тәртіптен тыс үшінші тұлғаларға берген. Бұл туралы білген үйлестіруші жағдайды қордың орталық кеңсесіне де, қорғаншылық органдарына да хабарламаған.

2026 жылдың сәуір айында құқық қорғау органдары үйлестірушіні ұстағаннан кейін қор оқиғаның мән-жайын білді. Қызметкер дереу жұмыстан шығарылды. Қор тергеумен толық ынтымақтастық орнатып, қамқорлықтағы аналарды сүйемелдеу процестеріне ішкі тексеріс бастады.

«Бұл – біздің бүкіл команда үшін де, қиын жағдайда бізге сеніп, көмегімізге жүгінген аналар үшін де күтпеген және ойға қонымсыз жағдай. Бұрынғы қызметкерге қатысты тергеу әрекеттері жүргізіліп жатқанын растаймыз; алғашқы күннен бастап біз құқық қорғау органдарымен тығыз жұмыс істеп келеміз.

Біз үшін ең маңыздысы – бала құқығының бұзылмауы.  Сондықтан біз тергеудің аяқталуын күтпей-ақ, бақылау мен қорғау жүйесін дереу күшейту туралы шешім қабылдадық.

Бұл – жүйелі өзгерістерді талап ететін маңызды сабақ. Біз барлық өңірлерде бақылауды күшейтіп, қосымша тексерістер жүргізіп, цифрлық қорғаныс құралдарын енгізіп, ішкі аудит бастамасын қолға алдық.

Біздің ұстанымымыз: балаларды заңсыз беру – қылмыс. Қор қызметінің 13 жылында біз жұмысымыздың аясында мұндай құқықбұзушылық әрекетінің орын алу ықтималдылығымен алғаш рет тап болдық. Бұл жағдай ұйымның жүйелі тәжірибесінің емес, нақты бір қызметкердің салғырттығының салдары. Біз әрбір баланың тек заң аясында отбасын табуын қамтамасыз ету үшін жұмыс істейміз.

Біздің міндетіміз – қамқорлыққа алынған аналарды сүйемелдеу жүйесін күшейтіп, мұндай тәуекелдерді процестер деңгейінде толық жою. Біз ашық әрекет етеміз және мұндай жағдайдың қайталанбауы үшін барлық қажетті шараларды қабылдап жатырмыз», – деп атап өтті «АНА ҮЙІ» ҚҚ басшысы Раушан Қайырбекова.

Анықтама: «АНА ҮЙІ» қоғамдық қоры 2013 жылдан бері жұмыс істейді. 13 жыл ішінде ұйым қиын жағдайға тап болған 9 000-нан астам әйелге көмек көрсетіп, Қазақстанда мыңдаған баланың өз отбасында қалуына ықпал етті. Қордың басты басымдығы – бала мүддесі мен қауіпсіздігін қорғау, сондай-ақ отбасын сақтау.